Simbang Bengi

By Herald's
Originally published in the Christmas Aslag, AY 2004-2005

Cabang lalapit ca quing luclucan cu
Carugcarug ya ing cacung salu
E cu balu nung bakit o nung nanu
Anti cu mong ating buring sabyan canacu

Peunan da na ca pin mang magsalita
Uli na ning maulaga ya ata
Ding laue mu gagalgal la pa
At piadian mo ring quecang salita

Saquit a panandaman sibucnan cung isalicut
Dapot e cu balu nung macananung gumulut
Uling lugud a metipun maluat a panaun
Binaui mu quing metung a gatpanapun

Mipapulai cu quing quecang sinabi
Macatapilan cung inisip ing mipalyaring iti
Angga na pin man quing pamanuli
Quiquiac cung magdilidili

Panyung tatalnan icua nang mebasa
Uling alang patugut tutulu ing lua
Taglus0taglus quing eran alang sala
Pasbul binuclat, migducmu, ginaga

Bie ala na pin mang casilbian
Anti cu mong caban a mipanacauanan
Masanting namu’t ating cacaluguran
Kasaup, kayabe king beyatan

Caibat na nita micabieng pasibayu
Muang panandaman, ena mipacalalu
Mas masanting mung bage siguru
Ing makaadya para quecatamu

Yanapin man ing mipalyari
Meging mayan ing pamikawani
Pareung sinulung a e sinisi
Matahimik a bie ing denasan tamu ngeni

Pasulung ing panaun pasku daratang
Tumagun cung misa quetan pisamban
E ca marine guiang ditac man
Inya linucluc ca quing canacung uanan

Ing misa miras ne quing ‘Ibpa Mi’
Bubulung ca, Oyni na ing cacatacutan cung dili
Yacu naman, nga cung cinabi
Ot ecu agad inisip ing mapalyaring iti

Cacurap cu mitatatalan na cata
Eya talan e mcaquilala
Nune anti ya caring mipalsinta
A e miquiquit maluat a maluat na

Anti cata mong micaintindi
Ining gamat cu e mu ne binili
Saya ing panandaman at e sinisi
Uling mibalic ca canacu quing Simbang Bengi